സർക്കാർ ഖജനാവിൽ നിന്നും ചെലവില്ലാതെ ഗതാഗത നിയമ പാലന പദ്ധതി

 Eye(I)s on the Road: Citizen-Powered Road Safety

സർക്കാർ ഖജനാവിൽ നിന്നും ഒരു രൂപ പോലും ചെലവാക്കാതെ പൊതുജനങ്ങളുടെ സഹകരണത്തോടെ നടത്താവുന്ന ഒരു പൗരപങ്കാളിത്ത ഗതാഗത നിയമ പാലന പദ്ധതിയെ കുറിച്ചാണ് താഴെ വിവരിക്കുന്നത്. ഗതാഗത നിയമലംഘനങ്ങൾ കാണുമ്പോൾ പൊതുജനങ്ങൾക്ക് അവ അപ്പോൾ തന്നെ റിപ്പോർട്ട് ചെയ്യാനും, അവ ഗതാഗത വകുപ്പ് പരിശോധിച്ച്, അവ പരിശോധിച്ചു ശരിയാണെന്നു തെളിഞ്ഞാൽ നിയമലംഘനം നടത്തിയവരുടെ മേൽ കനത്ത പിഴ ഈടാക്കി ആ പിഴയിൽ നിന്ന് നിശ്ചിതശതമാനം അത് റിപ്പോർട്ട് ചെയ്തവർക്ക് പ്രതിഫലമായി നൽകി ഇത്തരം നിയമലംഘനങ്ങൾ കുറയ്ക്കുന്നതിനും അത് വഴി സുരക്ഷിതമായ ഒരു റോഡ് സംസ്കാരം വളർത്തിയെടുക്കുന്നതിനുള്ള നിർദ്ദേശമാണ് ഇത്.

നിലവിലെ ഗതാഗതനിയമലംഘനങ്ങൾ അറിയാനായി സാധാരണ ക്യാമറകളും എഐ ക്യാമറകളും ഉണ്ടെങ്കിലും അവയുടെ സ്ഥാനം അതത് വഴികളിലൂടെ സഞ്ചരിക്കുന്നവർക്ക് കൃത്യമായി അറിയാവുന്നതിനാൽ ക്യാമറകളുടെ മുന്നിൽ എല്ലാവരും മാന്യമായി വണ്ടിയോടിക്കും. എന്നാൽ ക്യാമറകൾ ഇല്ലാത്തിടത്ത് നടക്കുന്ന ഗതാഗതനിയമലംഘനങ്ങൾ സങ്കൽപ്പിക്കാവുന്നതിനുമപ്പുറമാണ്. ഇതിനായി വഴി നീളെ ക്യാമറകൾ വെയ്ക്കുന്നത് പ്രയോഗികമല്ലാത്തതിനാൽ ഈ പദ്ധതി ഒരു വൻവിജയമായിരിക്കും. സ്വതവേ ദരിദ്രമായിരിക്കുന്ന സർക്കാർ ഖജനാവിൽ കുറച്ച് പണമെത്തിക്കാനും ഇത് സഹായിക്കും.

ഗതാഗതനിയമലംഘനങ്ങൾക്കുള്ള നിലവിലെ പിഴകൾ കുത്തനെ വർദ്ധിപ്പിക്കുകയാണ് സർക്കാർ ആദ്യം ചെയ്യേണ്ടത്. ഗതാഗത നിയമലംഘനങ്ങൾക്കുള്ള ദേശീയ തലത്തിലുള്ള പിഴ പത്തിരട്ടിയായി വർദ്ധിപ്പിക്കാൻ സംസ്ഥാന സർക്കാരുകൾക്ക് ഇതിനകം തന്നെ വ്യവസ്ഥയുള്ളതാണല്ലോ.  ഒരു ഒഫൻസിന് 5000, 10000, 25000 രൂപ മുതലായ നിരക്കിലായിരിക്കണം പിഴ ചുമത്തേണ്ടത്. അതിന്റെ അഞ്ചിലൊന്നെങ്കിലും വിവരം നല്കുന്നയാൾക്ക് പാരിതോഷികമായി നൽകണം. ഒരു വാഹനം വാങ്ങിക്കാനുള്ള കഴിവുണ്ടെങ്കിൽ അത് നിയമം ലംഘിച്ച് ഓടിക്കുകയാണെങ്കിൽ അതിനുള്ള പിഴ അടയ്ക്കാനുള്ള സാമ്പത്തിക സ്ഥിതിയൊക്കെ ഉടമകൾക്കുണ്ടാകും. ഇതിനെതിരേ വരുവാൻ സാധ്യതയുള്ള വാദം, സാമ്പത്തികമായി പിന്നോക്കം നിൽക്കുന്ന ഡ്രൈവർമാർക്ക് ഇതിന് പണമുണ്ടാകില്ല എന്നതായിരിക്കും. പണമില്ല എന്ന് വെച്ച് നിയമം ലംഘിക്കാനുള്ള സ്വാതന്ത്ര്യം ആർക്കും തീറെഴുതി കൊടുത്തിട്ടില്ലല്ലോ. നിയമം ലംഘിച്ചാൽ മാത്രം പിഴയടച്ചാൽ മതിയല്ലോ. അതിന് മര്യാദയ്ക്ക് വണ്ടിയോടിച്ചാൽ മതിയല്ലോ  .

ഇതൊരു പൂർണ്ണമായും നൂതനമായ ആശയമാണെന്ന് ഞങ്ങൾ അവകാശപ്പെടുന്നില്ല; എങ്കിലും, നിലവിലുള്ള സംവിധാനങ്ങളിൽ ചില പുതിയ ആശയങ്ങൾ ഇതിൽ ഉൾപ്പെടുത്തിയിട്ടുണ്ട്.

ലക്ഷ്യം

• യഥാർത്ഥ ഗതാഗത നിയമലംഘനങ്ങൾ റിപ്പോർട്ട് ചെയ്യാൻ പൗരന്മാരെ പ്രോത്സാഹിപ്പിച്ചുകൊണ്ട് റോഡ് സുരക്ഷ മെച്ചപ്പെടുത്തുക.
• അപകടങ്ങൾ കുറയ്ക്കുക,
• ഗതാഗത അച്ചടക്കം മെച്ചപ്പെടുത്തുക,
• ഗതാഗത നിയമനടപടികൾക്ക് പിന്തുണ നൽകുക,
• അധിക സാമ്പത്തിക ബാധ്യത തെല്ലും വരുത്താതെ സർക്കാരിന്റെ സാമ്പത്തിക സ്ഥിതി മെച്ചപ്പെടുത്തുക
• സർക്കാരിനെ സഹായിക്കുന്ന ഉത്തരവാദിത്തമുള്ള പൗരന്മാർക്ക് പാരിതോഷികം നൽകുക എന്നിവയാണ് ഈ പദ്ധതിയുടെ ലക്ഷ്യങ്ങൾ.

പദ്ധതി നടപ്പാക്കൽ

ഘട്ടം 1 – ഗതാഗത നിയമലംഘനം പകർത്തുക
ഒരു പൗരൻ താഴെ പറയുന്നവ പോലുള്ള ഗതാഗത നിയമലംഘനങ്ങൾ നേരിൽ കാണുകയാണെങ്കിൽ:

• റെഡ് സിഗ്നൽ മറികടക്കൽ
• അശ്രദ്ധമായോ അപകടകരമായോ വാഹനം ഓടിക്കൽ
• റോഡിന്റെ തെറ്റായ വശത്തുകൂടി വാഹനം ഓടിക്കൽ
• മദ്യപിച്ച് വാഹനം ഓടിക്കൽ (തെളിവ് ലഭ്യമാകുന്ന സാഹചര്യത്തിൽ)
• ഹെൽമെറ്റോ സീറ്റ് ബെൽറ്റോ ധരിക്കാതെ വാഹനം ഓടിക്കൽ
• അനധികൃത പാർക്കിംഗ് അല്ലെങ്കിൽ ഗതാഗത തടസ്സം സൃഷ്ടിക്കൽ
• മോട്ടോർ വാഹന നിയമപ്രകാരമോ മറ്റേതെങ്കിലും രീതിയിലുള്ളതോ ആയ നിയമലംഘനം

അവർക്ക് വ്യക്തമായ ഒരു വീഡിയോ പകർത്താവുന്നതാണ്. വാഹനത്തിന്റെ രജിസ്ട്രേഷൻ നമ്പറോ നമ്പർ പ്ലേറ്റോ അതിൽ വ്യക്തമായി കാണാൻ കഴിയണം.

ഘട്ടം 2 – തെളിവ് സമർപ്പിക്കുക
പൗരൻ വീഡിയോയ്‌ക്കൊപ്പം താഴെ പറയുന്ന വിവരങ്ങളും അയക്കേണ്ടതാണ്: 

• തീയതി, സമയം 
• സ്ഥലം (പറ്റുമെങ്കിൽ മാപ്പ് ലൊക്കേഷൻ)
• നിയമലംഘനത്തെക്കുറിച്ചുള്ള ലഘുവിവരണം, 

അംഗീകൃത സർക്കാർ വാട്‌സ്ആപ്പ് നമ്പർ, ടെലിഗ്രാം ചാനൽ, ഇമെയിൽ അല്ലെങ്കിൽ ഭാവിയിൽ നിലവിൽ വരുന്ന സർക്കാർ ആപ്ലിക്കേഷൻ എന്നിവയിലൂടെ വേണം ഇവ അയക്കാൻ.


പൊതുജനങ്ങളിൽ നിന്നുള്ള വിവരശേഖരണ സംവിധാനം തുടക്കത്തിൽ തന്നെ പ്രത്യേക മൊബൈൽ ആപ്ലിക്കേഷൻ വികസിപ്പിക്കുന്നതിന് പകരം, ഗതാഗത നിയമലംഘനങ്ങളുടെ ദൃശ്യങ്ങൾ സ്വീകരിക്കുന്നതിനായി വാട്സാപ്പ് (WhatsApp), ടെലിഗ്രാം (Telegram) തുടങ്ങിയ നിലവിലുള്ള ആശയവിനിമയ പ്ലാറ്റ്‌ഫോമുകളോ അല്ലെങ്കിൽ ഇതിനായി മാത്രമുള്ള ഒരു സർക്കാർ ഇമെയിൽ വിലാസമോ സർക്കാരിന് ഉപയോഗിക്കാവുന്നതാണ്. ഇത് പ്രാരംഭ ചെലവ് കുറയ്ക്കാനും പദ്ധതി ഉടൻ തന്നെ ആരംഭിക്കാനും സഹായിക്കും.

പദ്ധതി വിജയിക്കുകയും റിപ്പോർട്ടുകളുടെയും പിഴകളുടെയും എണ്ണം ഗണ്യമായി വർധിക്കുകയും ചെയ്താൽ, അടുത്ത ഘട്ടത്തിൽ ഇതിനായി ഒരു പ്രത്യേക സർക്കാർ മൊബൈൽ ആപ്ലിക്കേഷൻ വികസിപ്പിക്കാവുന്നതാണ്.

ഘട്ടം 3 – പരിശോധന
സമർപ്പിക്കപ്പെട്ട തെളിവുകൾ ട്രാഫിക് ഉദ്യോഗസ്ഥർ പരിശോധിക്കും. റിപ്പോർട്ടുകളുടെ എണ്ണം വർദ്ധിക്കുന്നതിനനുസരിച്ച്, താഴെ പറയുന്ന കാര്യങ്ങൾക്കായി ആർട്ടിഫിഷ്യൽ ഇന്റലിജൻസ് (AI) സംവിധാനം ഏർപ്പെടുത്താവുന്നതാണ്:

• വാഹന നമ്പർ സ്വയം തിരിച്ചറിയുക.
• വീഡിയോയുടെ ആധികാരികത പരിശോധിക്കുക.
• എഡിറ്റ് ചെയ്തതോ കൃത്രിമം വരുത്തിയതോ ആയ വീഡിയോകൾ കണ്ടെത്തുക.
• നിയമലംഘനത്തിന്റെ തരം തിരിച്ചറിയുക.

ഫോട്ടോകളെക്കാൾ വീഡിയോകളുടെ അടിസ്ഥാനത്തിൽ തീരുമാനമെടുക്കുന്നതാണ് എപ്പോഴും നല്ലത്; കാരണം, ഒരു സംഭവത്തിന്റെ ഒരു വശം മാത്രമേ ഫോട്ടോകളിൽ കാണാൻ കഴിയൂ. ഈ പരിമിതി ചില വീഡിയോകൾക്കും ഉണ്ടാകും. ചിലപ്പോൾ, അത്തരം ഏകപക്ഷീയമായ ദൃശ്യങ്ങളുടെ അടിസ്ഥാനത്തിൽ നിരപരാധികൾ പോലും ശിക്ഷിക്കപ്പെടാൻ സാധ്യതയുണ്ട്. 
റിപ്പോർട്ടുകളുടെ എണ്ണം ഗണ്യമായി വർദ്ധിക്കുകയും, പിഴയിനത്തിൽ ലഭിക്കുന്ന വരുമാനം, പൗരന്മാർക്കുള്ള  പാരിതോഷികം നൽകിയ ശേഷം, ഇത്തരത്തിലുള്ള സോഫ്റ്റ്‌വെയർ നിർമാണത്തിനായി ഏകദേശം ചെലവാകുന്ന തുകയുടെ ഇരട്ടിയെങ്കിലും ലഭിച്ചാൽ മാത്രമേ ഇതിന് വേണ്ട ആപ്പും, AI സംവിധാനവും നടപ്പിലാക്കാവൂ.

ഘട്ടം 4 – നിയമലംഘകർക്കെതിരെ നടപടി
പരിശോധനയ്ക്ക് ശേഷം, ട്രാഫിക് അധികാരികൾ നിയമം അനുസരിച്ച് പിഴകൾ ചുമത്തും. ആവർത്തിച്ചുള്ള ലംഘനങ്ങൾ നിരുത്സാഹപ്പെടുത്തുന്നതിനും റോഡ് അച്ചടക്കം മെച്ചപ്പെടുത്തുന്നതിനും ഗുരുതരമായ കുറ്റകൃത്യങ്ങൾക്ക് കനത്ത പിഴകൾ ചുമത്തണം. ആവർത്തിച്ച്‌ നിയമം തെറ്റിക്കുന്നവർക്കെതിരെ ശക്തമായ നടപടികൾ എടുക്കണം: ഉദാ: കനത്ത പിഴകൾ / ഡ്രൈവിംഗ് ലൈസൻസ് സസ്പെൻഡ് ചെയ്യൽ / റദ്ദാക്കൽ.

ഘട്ടം 5 – പൗരന്മാർക്കുള്ള പാരിതോഷികം
പിരിച്ചെടുക്കുന്ന പിഴയുടെ ഒരു നിശ്ചിത ശതമാനം UPI വഴിയോ സർക്കാർ അംഗീകൃത മറ്റേതെങ്കിലും പേയ്‌മെന്റ് സംവിധാനം വഴിയോ വിവരം നൽകുന്നയാളുടെ ബാങ്ക് അക്കൗണ്ടിലേക്ക് നേരിട്ട് ക്രെഡിറ്റ് ചെയ്യണം. റോഡ് സുരക്ഷ മെച്ചപ്പെടുത്തുന്നതിൽ സജീവമായി പങ്കെടുക്കുവാൻ പൗരന്മാരെ ഈ പാരിതോഷികം പ്രോത്സാഹിപ്പിക്കും.

ഘട്ടം 6 – വിവരം നൽകുന്നവരുടെ സംരക്ഷണം
വിവരം നൽകുന്ന വ്യക്തിയുടെ പേര്, വിലാസം, ഫോൺ നമ്പർ, മറ്റ് വ്യക്തിഗത വിവരങ്ങൾ എന്നിവ രഹസ്യമായി സൂക്ഷിക്കേണ്ടതാണ്. അംഗീകൃത സർക്കാർ ഉദ്യോഗസ്ഥർക്ക് മാത്രമേ ഈ വിവരങ്ങൾ ലഭ്യമാകാൻ പാടുള്ളൂ.

പദ്ധതിയുടെ പ്രധാനഗുണം

ഓരോ സ്ഥലത്തും വിലകൂടിയ സിസിടിവി ക്യാമറകളോ നിരീക്ഷണ സംവിധാനങ്ങളോ സ്ഥാപിക്കേണ്ട ആവശ്യം സർക്കാരിനില്ല. നിയമലംഘനങ്ങൾ റിപ്പോർട്ട് ചെയ്യാൻ പൗരന്മാർ സ്വന്തം മൊബൈൽ ഫോണുകളോ വാഹനങ്ങളിലെ ഡാഷ് ക്യാമറകളോ  ഹെൽമെറ്റ് മൗണ്ടഡ് ക്യാമറകളോ ഉപയോഗിക്കും; അതുവഴി പുതുതായി സാമ്പത്തിക ബാധ്യത ഒന്നും ഇല്ലാതെ ഈ പദ്ധതി തുടങ്ങാവുന്നതാണ്.

ഡാഷ് ക്യാമറകളുടെയും  ഹെൽമെറ്റ് മൗണ്ടഡ് ക്യാമറകളുടെയും   ഉപയോഗം പ്രോത്സാഹിപ്പിക്കുക
ഡ്രൈവർമാർ അല്ലാത്തവർ ഇക്കാര്യങ്ങൾ ചെയ്താൽ കൂടുതൽ പ്രോൽസാഹിപ്പിക്കുക; വാഹനം ഓടിക്കുന്നവർ മൊബൈൽ ഫോൺ ഉപയോഗിക്കുന്നത് അപകടകരവും അപകടങ്ങൾക്ക് കാരണമായേക്കാവുന്നതുമായ ഒരു പ്രവൃത്തിയായത് കൊണ്ട്  ഡാഷ് ക്യാമറകളുടെ ഉപയോഗം പ്രോത്സാഹിപ്പിക്കുന്നത് ആളുകളെ ഇതിൽ നിന്ന് പിന്തിരിപ്പിക്കാൻ സഹായിക്കും. ഡാഷ്ബോർഡ് ക്യാമറകൾ,   ഹെൽമെറ്റ് മൗണ്ടഡ് ക്യാമറകൾ   ഉപയോഗിച്ച് പകർത്തിയ വീഡിയോകൾക്ക് ഉയർന്ന മുൻഗണനയോ അധിക പാരിതോഷികമോ നൽകണം. (ഞങ്ങൾക്ക് ഡാഷ് ക്യാമറകളുടെയോ   ഹെൽമെറ്റ് മൗണ്ടഡ് ക്യാമറകളുടെയോ  കമ്പനികളുമായി യാതൊരു വിധ ബന്ധവുമില്ല.)  

മറ്റ് സംസ്ഥാനങ്ങളിൽ നിന്നുള്ള വാഹനങ്ങൾക്കെതിരായ നടപടി
മറ്റ് സംസ്ഥാനങ്ങളിൽ രജിസ്റ്റർ ചെയ്ത വാഹനങ്ങൾ ഗതാഗത നിയമലംഘനം നടത്തിയാൽ അവയ്ക്കും പിഴ ചുമത്തണം. പിഴ അടയ്ക്കാത്ത പക്ഷം, സംസ്ഥാനത്തേക്ക് പ്രവേശിക്കുന്നതിന് മുൻപ് അതിർത്തി ചെക്ക് പോസ്റ്റുകളിൽ വാഹനം തടയുകയും, ബാധകമായ നിയമവ്യവസ്ഥകളും സംസ്ഥാനങ്ങൾ തമ്മിലുള്ള ഏകോപനവും അനുസരിച്ച് പിഴ ഈടാക്കിയ ശേഷം മാത്രം പ്രവേശനം അനുവദിക്കുകയും ചെയ്യാം.

തെറ്റായ വിവരങ്ങൾ നൽകുന്നതിനുള്ള ശിക്ഷ
ഇനിപ്പറയുന്നവ ബോധപൂർവ്വം സമർപ്പിക്കുന്ന പൗരന്മാർക്ക് ഉചിതമായ ശിക്ഷ നൽകണം:
വ്യാജ വീഡിയോകൾ
എഡിറ്റ് ചെയ്ത വീഡിയോകൾ
പുതിയതാണെന്ന രീതിയിൽ അവതരിപ്പിക്കുന്ന പഴയ വീഡിയോകൾ
ഗതാഗത നിയമലംഘനം നടന്നിട്ടില്ലാത്ത വീഡിയോകൾ
ഈ സംവിധാനം ആവർത്തിച്ച് ദുരുപയോഗം ചെയ്യുന്നത് താഴെ പറയുന്ന നടപടികൾക്ക് കാരണമായേക്കാം: സാമ്പത്തിക പിഴ. റിപ്പോർട്ടിംഗ് സംവിധാനം ഉപയോഗിക്കുന്നതിൽ നിന്നുള്ള താൽക്കാലിക വിലക്ക്. റിവാർഡ് പ്രോഗ്രാമിൽ നിന്നുള്ള സ്ഥിരമായ വിലക്ക്.
തട്ടിപ്പോ കൃത്രിമത്വമോ തെളിയിക്കപ്പെട്ടാൽ നിയമനടപടി. ഇത് ദുരുപയോഗം തടയുന്നതിനും പദ്ധതിയുടെ വിശ്വാസ്യത നിലനിർത്തുന്നതിനും സഹായിക്കും.

പ്രതീക്ഷിക്കാവുന്ന നേട്ടങ്ങൾ

• റോഡ് സുരക്ഷ മെച്ചപ്പെടുത്തുന്നു.
• അശ്രദ്ധവും അപകടകരവുമായ ഡ്രൈവിംഗ് കുറയ്ക്കുന്നു.
• നിയമങ്ങൾ കർശനമായി നടപ്പിലാക്കുന്നതിലൂടെ ഉത്തരവാദിത്തത്തോടെയുള്ള ഡ്രൈവിംഗ് പ്രോത്സാഹിപ്പിക്കുന്നു.
• നിയമപാലനത്തിൽ പൊതുജന പങ്കാളിത്തം വർദ്ധിപ്പിക്കുന്നു.
• പിഴകളിലൂടെ സർക്കാരിന് അധിക വരുമാനം ലഭ്യമാക്കുന്നു.
• ചെലവേറിയ ട്രാഫിക് നിരീക്ഷണ സംവിധാനങ്ങളുടെ ആവശ്യം കുറയ്ക്കുന്നു.
• സുതാര്യവും സാങ്കേതികവിദ്യയിൽ അധിഷ്ഠിതവുമായ ഒരു ട്രാഫിക് നിയമപാലന സംവിധാനം സൃഷ്ടിക്കുന്നു.

ഓരോ വർഷവും ഏറ്റവും കൂടുതൽ നിയമലംഘനങ്ങൾ റിപ്പോർട്ട് ചെയ്തവർക്ക് വാഹനകമ്പനികളെ കൊണ്ട് സ്‌പോൺസർ ചെയ്യിച്ച് സമ്മാനമായി വാഹനങ്ങൾ കൊടുക്കാവുന്നതാണ്.

നിയംനിർമാണമോ ഭേദഗതിയോ വേണ്ട നിർദ്ദേശം കൂടി
അശ്രദ്ധമായ ഡ്രൈവിംഗ് മൂലം ഒരാളെങ്കിലും മരിക്കുകയാണെങ്കിൽ, ആ കുറ്റകൃത്യത്തെ മനുഷ്യഹത്യ ആയി കണക്കാക്കുന്ന തരത്തിൽ നിയമം പരിഷ്‌ക്കരിക്കുക. വാഹനമോടിക്കുന്നയാൾ മദ്യപിച്ചിരിക്കുകയോ ലഹരിവസ്തുക്കളുടെ സ്വാധീനത്തിലായിരിക്കുകയോ ചെയ്യുകയും, കുറഞ്ഞത് ഒരാളെങ്കിലും മരണപ്പെടുകയും ചെയ്യുന്ന സാഹചര്യത്തിൽ, ആ അപകടത്തെ കുറ്റകരവും മനഃപൂർവ്വവുമായ നരഹത്യയായി കണക്കാക്കുന്നതിനുള്ള നിയമവ്യവസ്ഥ കൊണ്ടുവരിക. ഈ സാഹചര്യത്തിൽ മരിച്ച ആളുകൾക്കുള്ള നഷ്ടപരിഹാരം കുറഞ്ഞത് 25 ലക്ഷം രൂപയെങ്കിലുമാക്കി ആ തുക മുഴുവൻ ആ ഡ്രൈവറിൽ നിന്ന് ഈടാക്കുന്നതിന് വ്യവസ്ഥ ഉണ്ടാക്കുക.

നിയമപരമോ പ്രായോഗികമോ ആയ പോരായ്മകൾ ഒഴിവാക്കി ഈ പദ്ധതി കൂടുതൽ വിപുലമക്കാവുന്നതാണ്.